《不妨試下戴軍錶》
一個佬嘅基本配置，除左衫褲鞋襪之外，就係一隻錶。睇一個佬戴咩錶，或多或少可以知佢係個點嘅人。
戴G-shock，著重實用性；戴精工，窮到燶；戴DW，個人較感性；勞力士太多人戴，歸類唔到。係到提提各位女士，唔好單純以錶嘅牌子去衡量男士嘅價值，佬編都見過超級富豪戴G-shock，專業人士戴Seiko（Well, Grand Seiko），相反亦有好多人幾個月唔食飯都要買隻勞。
不過，除左以上大路牌子外，佬編其實仲有一種另類而又佬味十足嘅推介－古董軍錶。以下略略介紹兩款佬編覺得靚嘅俾大家參考下。（入正題）
1. “A-11”：二戰時助美帝獲勝嘅錶
二戰時，多間唔同嘅鐘錶製造商都有出產A-11，佢地嘅共同特點係黑底白字、阿拉伯數目字1-12 、錶嘅最外圍有較細嘅字標示10、20、30等。當時美國空軍、海軍，甚至海軍陸戰隊，就係睇住佢黎對錶，所以對準確度都有一定嘅要求，一日嘅誤差唔可以多過30秒。
2. “B-Uhr”：永垂不朽嘅經典設計
同樣係二戰時期嘅產物，為德國轟炸機隊嘅標準軍錶。同樣係黑底白字，最易認嘅特色，係位於12點鐘位嘅向上三角形，同埋好似一對眼嘅左右兩點。B-uhr分Type-A 同Type-B兩種，Type-B中間會多一圈標示1-12，原本嘅三角形加兩點就變成一個向上箭嘴。呢隻錶嘅設計實在太經典，直到現時都仲有不少製造商以同類設計生產。
要買以上兩款軍錶，各位不妨上amazon等網站尋寶。與其戴D靠「marketing」，但品質完全唔掂嘅錶，倒不如買隻經得起世界大戰考驗嘅A11或B-uhr。戴出黎唔洗同人一模一樣，而且更有歷史份量，有人問起時仲可以拋下書包添。
＃軍錶 ＃佬之穿搭 ＃佬訊
Search